Sindri Snær Ólafsson
Löggiltur endurskoðandi

Sindri Snær hefur starfað hjá Deloitte frá árinu 2017 og unnið sig upp innan sviðsins. Hann byrjaði sem aðstoðarmaður en er nú í hlutverki verkefnastjóra.

🟢 Hver er menntun þín?
Ég kláraði BS í viðskiptafræði og hóf störf hjá Deloitte árið 2017. Eftir tvö ár fór ég í meistaranám í reikningshaldi og endurskoðun samhliða vinnunni hér.  Lauk svo löggildingu til endurskoðunar starfa í desember 2025.

Ég ætlaði mér alltaf að starfa í fjármálaheiminum en ég var ekki búinn að vera lengi hjá Deloitte þegar ég átta mig á því að störfin og verkefnin sem hér eru unnin eru mun meira spennandi heldur en ég hafði gert ráð fyrir í byrjun.

🟢 Hvernig hafa verkefnin þín breyst í gegnum árin?
Fyrstu árin geta verið erfið. Þú ert að vinna í mjög afmörkuðum verkefnum og stundum erfitt að átta sig á því hvernig það sem þú ert að gera passar inn í stóru myndina. En eftir því sem tíminn líður og þú lærir meira, þá vinnur þú þig upp og fyrir vikið breytist starfið svo mikið. Þú ferð að fá yfirsýn og í raun finna að þú ert að þjónusta viðskiptvini.

Núna, sem verkefnastjóri, þá sé ég um daglega verkefnastýringu, bæði á teyminu mínu og verkefnunum hverju sinni. Það sem þú varst að læra fyrst ertu nú farinn að kenna öðrum.

🟢 Hvað hefur komið þér mest á óvart varðandi endurskoðendastarfið?
Maður heldur að endurskoðandi sé bara einn í tölvunni að fletta upp í einhverjum fylgiskjölum en raunin er sú að þú kemst ekki í gegnum 10 mínútur af deginum þínum án þess að ræða við samstarfsfélaga eða viðskiptavini. Starfið felur því í sér gífurlega mikla teymisvinnu og samskipti. Við erum öll að vinna að sama verkefni og markmiði. Endurskoðendur þurfa því að vera góðir í mannlegum samskiptum líka, ekki bara góðir með tölur.

🟢 Eru verkefnin fjölbreytt?
Já, verkefnin eru mjög fjölbreytt og viðskiptavinirnir sömuleiðis. Þegar ég byrjaði á sínum tíma þá var ég til dæmis mikið að vinna með fasteignafélögum. Mér þótti það áhugavert svo ég hef sérhæft mig í þeim, sem og stórum eignarhaldsfélögum. Svo hef ég líka verið í verkefnum sem tengjast mínu áhugasviði, sem er fótboltinn og íþróttir. Það er mjög gaman að tvinna þetta saman og fá að þjónusta félög innan íþróttahreyfingarinnar. Þessu til viðbótar eru svo önnur og allt öðruvísi verkefni í bland, sem er mjög skemmtilegt. 

🟢 Hvað er það besta við starfið?
Fyrir mig er það sveigjanleikinn í starfinu. Ég var til dæmis að þjálfa fótbolta í mörg ár samhliða starfi og það gekk ótrúlega vel. Það er kannski algengt að fyrirtæki gefi þetta út en svo er raunin önnur, en hér er þetta raunverulega mín upplifun.

Lovísa Ólafsdóttir

Aðstoðarmaður

Lovísa er í hópi sérfræðinga Deloitte sem vinnur við endurskoðun upplýsingatæknikerfa og innri endurskoðun. Endurskoðun er nefnilega ekki bara endurskoðun og eru verkefni hennar gjörólík hins hefðbunda endurskoðanda, en þó nátengd.

🟢 Hvenær hófst þú störf hjá Deloitte og hver eru þín helstu verkefni?
Ég byrjaði hér í maí 2024. Mín helstu verkefni eru tölvuendurskoðun, sem er nátengd endurskoðun en hún á sér stað fyrr í ferlinu, við komum inn áður en vinna endurskoðendanna hefst. Ég er líka í innri endurskoðun, sem er allt öðruvísi heldur en hefðbundin endurskoðun, við erum t.d. að hjálpa fyrirtækjum að sjá hvort þau séu í fylgni við eigin verklag og lög og reglur. Síðan hef ég verið í ýmis konar ráðgjöf, svo sem varðandi jafnlaunavottun, áhættustýringu og áhættumat.

🟢 Hvernig styður þín vinna við endurskoðun?
Í tölvuendurskoðun erum við að taka út þau kerfi sem viðskiptavinur notar í starfsemi sinni. Sem dæmi ef fjárhagskerfi hjá fyrirtækjum virkar ekki sem skyldi, þá er ekki hægt að treysta neinum tölum eða gögnum sem koma þaðan. Þannig að þegar við höfum lokið okkar vinnu og endurskoðunin tekur við, þá er hægt að treysta á að allt virki og sé rétt. Og þar sem við erum að vinna með ólíka atvinnugeira þá eru þetta ólík kerfi og og ólíkir hlutir sem þú ert að skoða hverju sinni sem eykur þekkinguna enn frekar.

🟢 Hvaða færni finnst þér þú hafa þróað með þér í
starfinu?
Ég held að það hljóti að vera „þetta reddast“ hæfnin. Ég er líka búin að læra mikið um samskipti, til dæmis bara með því að sitja fundi með viðskiptavinum og stjórnendum hér. Svo hefur sjálfstraustið mitt líka aukist, ég finn það sérstaklega núna þegar ég er að kenna nýju starfsfólki hvað ég hef raunverulega lært mikið og hef mikla þekkingu.

🟢 Hvað hefur komið þér mest á óvart á þínum tíma hjá Deloitte?
Það kom mér mjög á óvart hvað ég fékk strax mikið traust. Strax á fyrsta degi var ég tekin með á fundi með viðskiptavinum. Fyrst var ég bara að hlusta og glósa, svo var ég farin að tala á fundunum og svo núna er ég sjálf farin að kynna á þeim. Annað sem kom mér mikið á óvart var hversu mikið er af ungu fólki hérna, ég bjóst ekki við því að það væri svona mikið stuð og stemning hérna!

🟢 Hvað er það besta við Deloitte?
Það besta við Deloitte er 100% fólkið, við erum ótrúlega góðir vinir og vinnan verður svo miklu auðveldari. Verkefnin geta oft verið krefjandi og stundum eru langir dagar en það er alltaf skemmtilegt því ég vinn með svo góðu fólki og með gott stuðningsnet.

Svo er ég í stjórn starfsmannafélagsins og þar er mikið fjör. Það er frábær vettvangur til þess að kynnast fleirum innan félagsins. Við erum t.d. með golfmót, októberfest, ratleiki, þorrablót og fleira. Það er svo dýrmætt að þekkja starfsfólk af öllum sviðum og njóta þess að læra af öllum. 

Fanney Þóra Rúnarsdóttir
Sérfræðingur

Fanney Þóra hóf sinn starfsferil í endurskoðun hjá EY í Noregi árið 2021 og við flutninga til Íslands var hún staðráðin í að halda áfram á þeirri braut hjá EY á Íslandi og síðar Deloitte.

🟢 Hvernig kom til að þú hófst störf í endurskoðun?
Það var í raun alveg óvænt. Ég ætlaði alltaf að fara í markaðsfræði og vera svaka skapandi en svo datt ég inn á endurskoðunina. Í fullri hreinskilni, þá vissi ég í raun ekki alveg hvað ég var að fara út í þegar ég réð mig til EY í Noregi á sínum tíma en starfið reyndist vera mjög fjölbreytt og skemmtilegt. Það er líka gaman að í gegnum kynningarefni fyrir viðskiptavini og í Excel-vinnu fæ ég útrás fyrir sköpunargleðina.

🟢 Hver er menntun þín?
Ég er útskrifaður viðskiptafræðingur úr Háskóla Reykjavíkur. Ég fór svo í meistaranám í reikningsskilum og endurskoðun samhliða starfi mínu hjá Deloitte og útskrifast þaðan í febrúar 2025. Mér fannst ég vera mjög vel undirbúin fyrir námið þar sem ég var búin að vera starfa við endurskoðun í nokkur ár, það hjálpar mikið að geta tengt fræðilega hluta námsins við raunveruleikann.

🟢 Hvað er það besta við að starfa við endurskoðun?
Fólkið – að tala við fólk og kynnast fólki, bæði innan Deloitte, því við erum auðvitað stórt fyrirtæki, en líka viðskiptavinum og fólki í  atvinnulífinu. Þú getur verið snillingur með tölur og í Excel vinnunni en samskipti innan teyma og við viðskiptavini eru svo rosalega stór partur af starfinu. Það er því mikilvægt að geta tekist á við þann hluta starfsins líka.

🟢 Hvaða færni hefur þú þróað með þér í starfinu?
Ég held ég hafi fyrst og fremst öðlast meira sjálfstraust og trú á sjálfri mér. Að geta tekið ákvarðanir og staðið með þeim. Ég hef líka orðið þolinmóðari og umburðarlyndari. Eins og ég kom inn á hér að ofan, þá snýst starfið mjög mikið um mannleg samskipti og það er mikilvægt að nálgast fólk á þann hátt sem hentar því.

🟢 Finnst þér staðalímynd endurskoðandans vera að breytast?

Já, eða ég vona það allavega. Ég legg mig sérstaklega fram við að reyna breyta þessari gömlu sataðalímynd af endurskoðanda sem svo margir hafa. Þessi staðalímynd er úrelt því staðreyndin er sú að endurskoðendur eru allskonar! Hér eru endurskoðendur með ólíkan bakgrunn, fjölskylduhagi og áhugamál – ég gæti ekki beðið um betri blöndu af samstarfsfélögum.

Ingibjörg Erla Grétarsdóttir
Verkefnastjóri

Ingibjörg Erla er afreksíþróttakona í Taekwondo, er í landsliðinu og er margfaldur Íslands- og Norðurlandameistari. Hún hefur á undanförnum árum samtvinnað starf í endurskoðun við atvinnumennskuna.

🟢 Hvenær hófst þú störf hjá Deloitte?
Ég byrjaði hér haustið 2017. Ég sá atvinnuauglýsingu frá Deloitte þegar ég var að útskrifast úr háskólanámi og ákvað að sækja um. Þetta var alveg nýtt fyrir mér en ég hugsaði „Jájá, ég prófa þetta í að minnsta kosti eitt ár,“ en svo er ég hér enn átta árum seinna.

🟢 Hvað ertu menntuð?
Ég er með BS gráðu í viðskiptafræði og M.Acc. gráðu í reikningshaldi og endurskoðun. Ég kom til Deloitte beint eftir viðskiptafræðina og eftir eitt ár í starfi, þá fórum við nokkur saman héðan í M.Acc. námið. Þetta eru samtals þrjár annir og alveg mikil keyrsla svona samhliða starfinu en það hjálpaði að við vorum góður hópur og fórum í gegnum þetta saman.

🟢 Hvernig gengur að samtvinna starfið og Taekwondo?
Það gengur! Það getur vissulega verið mjög krefjandi að æfa svona mikið, sinna vinnunni og svo reyna að eiga eitthvað félagslíf. Þegar ég fór í háskólanám valdi ég t.d.

viðskiptafræði því þar gat ég tekið langflesta áfangana í fjarnámi. Íþróttin hefur því alltaf verið í miklum forgangi hjá mér enda hef ég keppt og æft frá því að ég var átta ára.

Ég er mjög heppin með starfið mitt því hér sýna stjórnendur og samstarfsfólk mikinn skilning og hvetja mig áfram til þess að æfa. Ég er alla jafna að keppa erlendis 1-2x í mánuði og svo eru nær mánaðarlegar æfingaferðir erlendis líka. Eins og er, er ég í 50% starfi sem er ekki endilega sjálfgefið en hér fæ ég sveigjanleika og fullan stuðning – ég gæti ekki sinnt íþróttinni minni ef ekki væri fyrir það.

🟢 Þú varst partur af Deloitte Olympic Teams árið 2023, hvernig var það verkefni?
Það var mjög skemmtilegt og gaman að fá að taka þátt í svona stóru verkefni hjá Deloitte Global. Þetta var sumsé hópur Deloitte starfsfólks alls staðar að úr heiminum sem átti það sameiginlegt að vera afreksíþróttafólk og við vorum öll að reyna að tryggja okkur keppnisrétt á Ólympíuleikunum 2024. Verkefnið stóð yfir í rúmt ár og fól í sér reglulega fundi með hópnum, fyrirlestra og þátttöku í ýmsu kynningar- og markaðsefni. Til að mynda kom stórt teymi frá Deloitte Global hingað til lands til að taka við mig viðtal og fylgja mér eftir, bæði í vinnunni og á æfingum.  

🟢 Hvað er það besta við starfið þitt?
Ég held ég verði að segja samstarfsfólkið, það er svo ótrúlega góð stemning hérna. Svo er það starfsþróunin og öll tækifærin til að læra. Ég byrjaði sem aðstoðarmaður, vann mig upp í stöðu sérfræðings og nú er ég verkefnastjóri. Að geta þróast í starfi en hafa um leið sveigjanleika til að stunda mína íþrótt er ómetanlegt. 

Pétur Hansson
Meðeigandi

Pétur hefur starfað hjá Deloitte í tvo áratugi, eða allt frá árinu 2006. Hann er einn af meðeigendum félagsins auk þess að sinna hlutverki áhættu- og gæðastjóra fyrir endurskoðun.

🟢 Hvenær hófst þú störf hjá Deloitte?
Ég byrjaði hjá Deloitte árið 2006 svo ég hef verið hér í 20 ár. Það er samt vert að taka það fram að þó það sé sami vinnuveitandi á ferilskránni minni öll þessi ár, þá hef ég átt fjölbreyttan feril og verið í mörgum hlutverkum yfir þennan tíma. Ég upplifi það alls ekki að ég sé búinn að sinna sama starfinu í 20 ár, þvert á móti.

🟢 Hver eru þín helstu verkefni?
Ég ver hluta ársins í hlutverki gæða- og áhættustjóra, þá helst fyrir endurskoðunarsvið þar sem ég aðstoða með allt sem viðkemur, eins og nafnið gefur til kynna, áhættu- og gæðamálum. Stór hluti af þessari vinnu felur til að mynda í sér samstarf og samskipti við önnur Deloitte aðildarfélög, einkum innan Norðurlandanna og Evrópu. Þessu til viðbótar starfa ég svo auðvitað líka sem endurskoðandi og þjónusta fjölda viðskiptavina, allt frá félögum sem rétt skríða yfir endurskoðendaskyldu og yfir í stór, skráð félög. Að mínu mati helst þetta tvennt mjög vel í hendur. Með því að vera bæði í innri vinnu og þjónusta viðskiptavini finnst mér ég sinna báðum hlutverkum miklu betur.

🟢 Stefndir þú alltaf á að verða endurskoðandi?
Nei, ég vissi reyndar aldrei að ég ætlaði að verða endurskoðandi. Ég byrjaði í stærðfræði í Háskóla Íslands, tók síðan smá verkfræði en tók svo pásu frá námi. Ég fór síðan í svokallað áhugasviðapróf sem leiddi mig í viðskiptafræði. Í viðskiptafræðinni valdi ég alltaf þau fög þar sem ekki þurfti að skrifa ritgerðir, svo með því að velja mig frá þeim þá valdi ég mig óvart í áttina að endurskoðuninni.

Endurskoðendastarfið reyndist svo bara vera rosalega skemmtilegt og fjölbreytt, það er alltaf eitthvað nýtt. Ég er að gera allt annað í vinnunni í dag heldur en fyrir 10 árum síðan og jafnvel bara fyrir fimm árum síðan. Hvert ár kemur með nýja áskorun, ný verkefni, ný verkfæri, nýja staðla, nýja aðferðafræði og alls konar hluti sem við þurfum að fylgja eftir. Starf endurskoðandans er í stöðugri þróun og krefst þess að við séum opin fyrir því að vaxa og hlaupa samhliða þeirri þróun.

🟢 Ertu með einhver skilaboð til þeirra sem eru að íhuga starf í endurskoðun hjá Deloitte?
Að vera með opin hug og hafa gaman að þessu. Endurskoðun er ekki starf sem þú masterar á einu ári og gengur svo að því vísu. Það er alltaf eitthvað nýtt að gerast í faginu og ef maður ber sig eftir því, þá er alltaf eitthvað nýtt sem hægt er að læra. Það er trú sem ég hafði strax frá fyrsta degi og sú trú hefur ekki verið tekin af mér.

Þetta getur verið yfirþyrmandi til að byrja með og oft á tíðum krefjandi, en þetta er skemmtilegt og rosalega fjölbreytt. Og hvort sem þú ert hér enn eftir 20 ár eða finnur þig á annarri vegferð síðar meir, þá þori ég að fullyrða það að það er enginn sem hefur unnið hjá Deloitte, hvort sem það er til skemmri eða lengri tíma, sem er ekki betri einstaklingur fyrir vikið.

Anna Ingunn Svansdóttir
Aðstoðarmaður

Anna Ingunn hefur starfað hjá Deloitte frá því í október 2024. Hún er búsett í Keflavík og hefur skipt tíma sínum á milli starfsstöðva félagsins í Reykjanesbæ og í Kópavogi.  

🟢 Hver er menntun þín og hvernig kom til að þú byrjaðir að starfa hjá Deloitte?
Ég kláraði viðskiptafræði frá Háskólanum á Akureyri í júní 2024. Ég valdi viðskiptafræðina því mér fannst það spennandi og fjölbreytt nám með marga möguleika fyrir framtíðina. Ég var í rauninni ekki alveg búin að ákveða hvað ég vildi gera með þá gráðu en stærðfræði og tölur hafa alltaf legið vel fyrir mér. Síðasta árið mitt í náminu var ég að skoða störf tengd náminu og rakst á auglýsingu um starf hjá Deloitte og þar var ég heppin því mér líður vel í vinnunni og tekst á við skemmtileg verkefni daglega.

🟢 Hvernig hefur fyrsta árið verið?
Mjög skemmtilegt. Það var tekið vel á móti mér og mér leist vel á þetta. Þegar ég hugsa til baka núna þá voru fyrstu mánuðirnir vissulega mjög krefjandi þar sem ég var að læra svo margt nýtt. Mér finnst ég hafa lært ótrúlega mikið á þessu eina ári og verkefnin hafa verið mjög fjölbreytt. En þótt þetta sé krefjandi í byrjun þá var ég aldrei ein og allir tilbúnir að hjálpa og aðstoða mig.

🟢 Hver eru þín helstu verkefni?
Mín verkefni snúa aðallega að endurskoðun og uppgjörs- og framtalsvinnu. Það er samt svo margt sem fellur þar undir og verkefnin eru fjölbreytt, miklu fjölbreyttari en mig grunaði þegar ég byrjaði.

🟢 Hvernig er að starfa á fleiri en einni starfsstöð?
Það er mjög gaman og mikið af tækifærum í því! Ég bý í Keflavík og æfi körfubolta sem er tímafrekt. Ég óskaði eftir því að fá að vera á skrifstofunni í Keflavík þar sem það hentar mjög vel með körfunni og var það ekkert mál. Það er líka alltaf gaman að koma á Dalveginn og hitta samstarfsfólkið mitt þar.

Fyrir mig er mikill sveigjanleiki fólginn í því að geta valið starfsstöð út frá verkefnum dagsins hverju sinni og það sparar mér óneitanlega mikinn tíma. Ég vinn flesta daga í Reykjanesbæ en kem alltaf reglulega á Dalveginn, t.d. til að hitta teymið mitt. Þetta hentar mér mjög vel - mér finnst ég ná því besta frá báðum stöðum. 

Auður Brynja Sölvadóttir
Sérfræðingur

Hjá Deloitte er algengt að einstaklingur hefji störf í endurskoðun meðan á námi stendur. Auður Brynja er í hópi þeirra sem stundað hafa meistaranám í reikningshaldi og endurskoðun samhliða starfi.

🟢 Hver er menntun þín?
Ég lærði viðskiptafræði í Háskólanum á Akureyri. Fyndið en bókhaldsáfanginn í viðskiptafræðinni vafðist fyrir mér og við útskrift fannst mér t.d. debit og kredit ennþá bara mjög flókið. Mig langaði að styrkja mig í því og fór því að vinna í bókhaldi. Þar kviknaði fyrst áhuginn á endurskoðun sem síðar leiddi mig í framhaldsnám í reikningshaldi og endurskoðun sem ég klára árið 2023.

🟢 Hvenær byrjaðir þú hjá Deloitte og hvernig gekk að vera í námi samhliða vinnunni?
Ég byrjaði í nóvember 2022 samhliða náminu. Ég fann um leið og ég byrjaði hvernig vinnan nýttist mér í skólanum og öfugt. Þú ert að fást við verkefni í vinnunni sem þú lærir um í náminu og það hjálpar þér að setja hlutina í betra samhengi og það fer einhvern veginn allt að smella.

Þetta fyrirkomulag átti mjög vel við mig, að gera  þetta samhliða. Það er mikill sveigjanleiki og stuðningur til náms hjá Deloitte og algengt að starfsfólk, sérstaklega þau sem eru að byrja endurskoðunarferilinn, sé að sinna hvoru tveggja. Við vorum t.d. nokkrir samstarfsfélagar í náminu á sama tíma sem gerði þetta ennþá skemmtilegra.

🟢 Grunaði þig að þú ættir eftir að enda í endurskoðun?
Ég get ekki sagt það! Sérstaklega ekki þegar ég sat og klóraði mér í höfðinu í bókhaldsáfanganum í viðskiptafræðinni. Eins og ég nefndi, þá kviknaði áhuginn á endurskoðun þegar ég starfaði við bókhald því mig langaði að prófa að vera „hinum megin við borðið“; ekki vera sú sem sér um bókhaldið sjálft, heldur að vera sú sem fer yfir þá vinnu og sannreynir hana. Ég vildi sjá hvort það væri eitthvað sem mig langaði að leggja fyrir mig – sem það svo sannarlega er. Það mætti því segja að blessaður bókhaldsáfanginn hafi leitt mig út í endurskoðun.

🟢 Hvernig hefur þú þróast í starfi frá því að þú byrjaðir?
Ég byrjaði sem aðstoðarmaður en er nú orðin sérfræðingur og því fylgja stærri og ábyrgðarmeiri verkefni. Mín helstu verkefni núna eru endurskoðun, uppgjör og ársreikningagerð og svo ýmis greiningarvinna. Svo er ég í samskiptum við viðskiptavini sem er mjög gaman.

Sem sérfræðingur er ég líka að aðstoða aðra með sín verkefni, eins og nýja aðstoðarmenn, og hjálpa þeim að þróast og vaxa í starfi. Starfið er því í raun mjög fjölbreytt og líflegt og maður er endalaust að læra og bæta við sig þekkingu.

Arnór Kristinn Hlynsson
Löggiltur endurskoðandi

Arnór er í hópi ríflega 50 löggiltra endurskoðenda hjá Deloitte. Hann hlaut löggildinguna árið 2024, þá búinn að starfa hjá félaginu í sex ár og tilbúinn að takast á við það stóra verkefni sem löggildingarprófin eru.

🟢 Hvenær hófst þú störf hjá Deloitte og hver er menntun þín?
Ég byrjaði árið 2018. Ég er viðskiptafræðingur frá Háskólanum í Reykjavík, er með meistaragráðu í reikningshaldi og endurskoðun og er löggiltur endurskoðandi. Ég hóf störf hér og byrjaði á M.Acc.-gráðunni á sama tíma en þá var ég búinn að ákveða að fara alla leið með endurskoðunina.
Finnst gaman að hugsa til þess að eftir viðskiptafræðina flutti ég til Danmerkur og byrjaði í CBS í meistaranámi sem heitir Accounting, strategy and control. Ég skráði mig þó fljótlega úr því námi enda var þetta CBS-ævintýri eingöngu sprottið út frá því að mér fannst ekki nógu sexí að vera endurskoðandi og fannst hljóma betur að vera með meistaragráðu úr CBS. Sumu er samt greinilega bara ætlað að verða og ég sé alls ekki eftir þeirri ákvörðun að segja mig úr náminu og í framhaldinu hefja störf hjá Deloitte.

🟢 Hvenær fórstu í löggildinguna og hvernig voru
prófin?
Ég fór haustið 2024. Eins og þetta er í dag, þá eru þetta í raun tvö próf á þremur prófdögum. Í stærra prófinu er prófað úr endurskoðun og reikningsskilum. Það próf er  2x 8 klukkustundir – það tekur vel á. Minna prófið er svo í grunninn skattapróf og dekkar restina af þeirri þekkingu sem við eigum að búa yfir. Þetta eru allt gagnapróf en þú mátt ekki vera með nein rafræn gögn. Þú ert því með gífurlegt magn af gögnum á pappír sem þú þarft að þekkja upp á 10 svo enginn óþarfa tími fari í að leita að svörum.

🟢 Fékkstu hvatningu frá þínum yfirmanni að fara í
löggildinguna eða fannstu sjálfur að þú varst tilbúinn?
Ég held að eftir um fimm til sex ár í starfi, þá er yfirmaður þinn alltaf að fara eiga þetta samtal við þig; hvort að áhuginn sé að fara í prófið og hvenær þá. Það er gott að muna að það er eitt að vera með prófgráðuna og annað að kunna að nota hana. Þú getur verið alveg svakalega góður námsmaður og náð prófinu, en þú þarft að hafa færnina sem fylgir hlutverkinu og vera tilbúinn í þá ábyrgð.

🟢 Hvernig var undirbúningur fyrir löggildinguna, bæði
með tilliti til fjölskyldunnar og daglegra verkefna í vinnunni?
Þetta gekk ótrúlega vel miðað við vinnuna sem fer í þetta. Yfirmaður minn tók alla mína bolta í vinnunni, ég fékk fullan stuðning og gat sett allan minn fókus á lærdóminn. Ég er líka rosalega vel giftur og það skiptir öllu máli, þessi lærdómur tekur yfir líf þitt í þrjá mánuði og fátt annað kemst að.

Stuðningurinn hérna innanhúss er svo auðvitað frábær; að hafa aðgang að öllum þessum sérfræðingum og geta fengið aðstoð. Hér halda allir með þér og það vilja allir að þér gangi vel!