Lífið hjá Deloitte | Deloitte Ísland

Vinsamlegast virkjaðu JavaScript til að skoða síðuna.

Skoða laus störf

Hjá Deloitte á Íslandi starfa um 360 frábærir einstaklingar á starfsstöðvum okkar víðsvegar um landið. Við erum eins ólík og við erum mörg en saman vinnum við að því að hafa þýðingarmikil áhrif fyrir hvort annað, viðskiptavini og samfélagið allt.

Hvað gerir lífið hjá Deloitte svo einstakt? Menning okkar byggir á fjölbreytileika, samvinnu, metnaði og jöfnum tækifærum. Við leggjum okkur fram við að skapa umhverfi þar sem öll geta verið þau sjálf og blómstrað á sinn hátt.

Hjá Deloitte starfar landsliðsfólk, tónlistarséní, ömmur og afar, golfarar, bókaormar, göngugarpar, kaffiunnendur, sjósundskempur, blóðgjafar, hundaeigendur og svo mætti lengi telja!

360

sérfræðingar

fjölbreyttur hópur sem starfar á sex starfsstöðvum um landið

38

meðalaldur

hér starfa ungir sem aldnir og er aldursbilið mjög breitt

8,6

starfsánægja

hér líður okkur vel og starfsánægja mælist 8,6 af 10 í nýjustu könnun

Vinnuumhverfið

Notalegt andrúmsloft í skapandi og hvetjandi umhverfi

Opið vinnurými

Við vinnum í opnu vinnurými og nýtumst við frjálst sætaval en hvert svið á þó sitt eigið heimasvæði. Vinnuaðstaða dagsins er valin út frá verkefnum hverju sinni. Í lok dags skiljum við borð eftir hrein og auð.

Fundaraðstaða

Fjölbreyttir vinnudagar og verkefni kalla á fjölbreytt fundar- og vinnuherbergi. Á Dalvegi eru fjölmargar tegundir af fundarherbergjum, svo sem einstaklingsherbergi fyrir fjarfundi, símaherbergi, sófaherbergi, lesherbergi og ýmis fundarherbergi fyrir bæði minni og stærri fundi.

Kaffi og kruðerí

Fyrsta flokks kaffiaðstaða er á vinnuhæð starfsfólks þar sem fólk getur tyllt sér með kollegum yfir kaffibolla. Í rýminu eru nokkrar kaffivélar, tveir ísskápar, frystiskápur, örbylgjuofn, samlokugrill, brauðrist og tvær uppþvottavélar. Hjá Deloitte getur fólk gætt sér á alls konar hollmeti svo sem hrökkkexi, ferskum ávöxtum, skyri... og súkkulaðikexi - það verður að vera smá sykur!

Dalurinn

Dalurinn er stórt fjölnotarými á 5. hæð. Þar höldum við til dæmis starfsmannafundi, ýmsar starfsmannaskemmtanir og viðburði fyrir viðskiptavini og aðra gesti. Þar getur starfsfólk líka tyllt sér í spjall með góðan kaffibolla til að brjóta upp á hversdaginn.

Rótin

Rótin er leikjaherbergi sem starfsfólk hefur aðgang að. Þar er hægt að gera sér glaðan dag í pílu, borðtennis, billiard, playstation og svo mætti lengi telja.

Læst hjólageymsla

Hjólageymsla er í kjallara sem starfsfólk hússins getur notað. Geymslan er aðgangsstýrð og aðeins hægt að komast þar inn með starfsmannakorti. Hjólið er því frábær samgöngumáti fyrir starfsfólk, einkum í ljósi góðrar búningsaðstöðu.

Búningsaðstaða

Búningsklefar eru í kjallara sem starfsfólk hússins getur nýtt sér. Klefarnir eru aðgangsstýrðir og aðeins hægt að komast þar inn með starfsmannakorti. Klefarnir eru þrír, einn kvennaklefi, einn karlaklefi og einn fyrir öll kyn. Kvenna- og karlaklefi er hvor um sig með þremur sturtum, munaskápum og þurrkskáp. Allar sturtur eru lokaðar klefasturtur.

Ambrosial Kitchen

Á fyrstu hæð á Dalvegi er veitingastaðurinn Ambrosial Kitchen sem er opinn fyrir starfsfólk hússins, auk þess sem aðrir gestir geta kíkt inn. Þar er í boði morgun- og hádegismatur, auk þess sem hægt er að panta kvöldmat. Deloitte niðurgreiðir bæði morgun- og hádegismat fyrir starfsfólk.

Innlit á Dalveginn

Það er sagt að mynd segi meira en 1.000 orð - hvað þá með myndband?

Hér getur þú fengið innlit í aðstöðuna í höfuðstöðvum okkar að Dalvegi 30; vinnustað þar sem fólk fær að vaxa og hugmyndir fá að blómstra.

Komdu í stafræna heimsókn!

Vöxtur og þróun

Við lærum svo lengi sem við lifum

Starfsþróun

Hver og einn öðlast þekkingu og færni í þeim verkefnum sem hann vinnur, í gegnum reglulega endurgjöf og í gegnum þann fjölda námskeiða sem starfsfólki okkar stendur til boða á hverju ári. Símenntun er krafa hjá okkur, ekki forréttindi. Ár hvert eru ákveðin skyldunámskeið sem þarf að ljúka, til að mynda í siða- og óhæðismálum, netöryggi og ýmsu er snýr að verklagsreglum félagsins. Þá eru námskeið sem snúa sérstaklega að starfsþrepi hvers og eins. Allt starfsfólk Deloitte lýkur að meðaltali 40 þjálfunarstundum á ári. Þá miðla reyndustu sérfræðingar okkar þekkingu á formlegum námskeiðum innanhúss. Allt starfsfólk hefur aðgang að þekkingarbrunni Deloitte þar sem má nálgast fjölbreytta fræðslu og þekkingu og þjálfun í þeim þáttum sem starfið gerir kröfu um.

Frammistöðumat

Við notumst við frábært frammistöðumatskerfi, SuccessFactors, sem þróað er af Deloitte Global og notað af öllum aðildarfélögum. Í Success Factors getur starfsfólk sett sér markmið, bæði til skemmri og lengri tíma, óskað eftir endurgjöf frá yfirmönnum og samstarfsfólki, sem og gefið endurgjöf. Tímanleg endurgjöf og tíð, opin og heiðarleg samtöl eru lykilatriði í að bæta frammistöðu, þekkja það sem vel er gert og laga það sem má bæta.

Alþjóðleg starfsreynsla

Innan Deloitte er virkt svokallað „Mobility Program“. Þetta þýðir að starfsfólk getur, þegar svo ber við, tekið þátt í alþjóðlegum verkefnum og/eða starfað erlendis í skemmri eða lengri tíma. Með því að vinna þvert á landamæri og menningarsvæði öðlast starfsfólk dýrmæta reynslu, eykur færni sína og hæfni og eflist svo um munar, bæði faglega og persónulega.

Deloitte University

Deloitte á og rekur Deloitte University á sex stöðum um heiminn. Þar eru haldin námskeið, vinnustofur og leiðtogaþjálfun sem miða að því að efla faglega færni og leiðtogahæfni, auk þess að styrkja tengslanet innan félagsins. Deloitte University er því ekki hefðbundinn háskóli, heldur mikilvægur hluti af mannauðs- og fræðslustefnu félagsins.

Það skiptir máli að hafa gaman

STÚSS starfsmannafélag, Deloitte og teymin sjálf gæta þess að brjóta upp hversdaginn. Hefðir spila stóran þátt í okkar viðburðahaldi og við höldum til dæmis árshátíð árlega, þorrablót, áramótagleði, haustfagnað, jólagleði og komum öll saman í föstudagskaffi í hverjum mánuði.

Við höfum líka mjög gaman af hinu óvænta og því skellum við oft í ýmsa viðburði eins og pub-quiz, gefum óvæntan glaðning eða nærum litlu hlutina eins og að deila föstudagslagi eða bröndurum.

Þá eru hinir ýmsu hópar og félög hér innanhúss eins og hlaupahópur, fótboltahópur, golfklúbbur, vondudrykkjafélag og svo mætti lengi telja.

1. Umsókn

Allar umsóknir um störf fara í gegnum ráðningarkerfið okkar SmartRecruiters. Þar sendir þú inn umsókn ásamt öðrum gögnum sem kann að vera óskað eftir. Við leggjum okkur fram við að fara í gegnum allar umsóknir eins fljótt og auðið er, en það getur tekið nokkra virka daga. Öllum umsóknum er svarað.

2. Starfsviðtal

Ef við teljum að starfið henti þér bjóðum við þér í viðtal. Fyrsta viðtal er alla jafna með sviðsstjóra þess sviðs sem starfið tilheyrir og fulltrúa mannauðsteymis. Hér fáum við að kynnast þér betur, förum nánar yfir hvað starfið felur í sér og svörum þeim spurningum sem þú kannt að hafa.

Viðtal tvö, og eftir atvikum viðtal þrjú, felur í sér yfirferð á verkefninu sem þú skilaðir, sjá atriði þrjú, og ítarlegra samtal um starfsábyrgð, hlutverk, o.s.frv.

3. Verkefni

Við gætum beðið þig um að leysa verkefni eftir fyrsta viðtal. Þetta gerum við til þess að fá betri tilfinningu fyrir því hvernig þú vinnur og hvernig þínir styrkleikar geta nýst teyminu. Verkefnið fer eftir eðli starfsins og getur reynt á t.d. rökhugsun, ritfærni og framsetningu á efni.

Þú færð endurgjöf á verkefnið í næsta viðtali.

4. Endurgjöf og mögulegt starfstilboð

Ef bæði við og þú teljum að við eigum samleið, þá bjóðum við þér starfstilboð. Þegar það er samþykkt er ráðningarsamningur undirritaður. Undanfari er söfnun meðmæla, en það gerum við aldrei án þinnar vitneskju.

Ef þú hefur komið í viðtal til okkar en færð ekki starfstilboð erum við boðin og búið að gera nánar grein fyrir ákvörðun okkar. Að sama skapi tökum við fagnandi á móti endurgjöf á ráðningarferlið, enda er það einlægur vilji okkar að ferlið sé góð upplifun fyrir alla sem hér sækja um.

Yes

No