Fjármálastjórakönnun Deloitte er nú lögð fyrir einu sinni á ári hér á landi og er tilgangur hennar að sýna mat fjármálastjóra á stöðu fyrirtækja og efnahagsumhverfi. Þetta er í 20. sinn sem könnunin er framkvæmd hér á landi og í 12 sinn sem hún er unnin í samstarfi við önnur aðildarfélög Deloitte í Evrópu. Niðurstöður endurspegla því skoðanir fjármálastjóra á Íslandi í samanburði við fjármálastjóra í öðrum Evrópulöndum, þar sem við á. Meðaltal niðurstaðna í Evrópu er vegið eftir landsframleiðslu hvers lands.
Rafrænn spurningalisti var sendur til fjármálastjóra 300 stærstu fyrirtækja landsins í apríl 2024 og viljum við þakka þeim sem tóku þátt kærlega fyrir.
50%
íslenskra fjármálastjóra telur að hagvöxtur muni aukast á næstu tveimur árum
33%
íslenskra fjármálastjóra telja sig standa frammi fyrir mikilli óvissu
79%
íslenskra fjármálastjóra telja lántöku hjá bönkum óhagkvæma
Væntingar til reksturs
Nettó viðhorf fjármálastjóra í Evrópu gagnvart þróun tekna, fjárfestinga og ráðninga nýrra starfsmanna á næstu 12 mánuðum mældist jákvætt, en lækkaði þó örlítið á milli ára.
Nettó viðhorf gagnvart þróun EBITDA á næstu 12 mánuðum stendur í stað og er áfram jákvætt þó að breyting sé á milli landa.
Markaðir og efnahagur
Helmingur fjármálastjóra á Íslandi (50%) telur að hagvöxtur muni aukast á næstu tveimur árum. Hlutfallið hefur hækkað um 11 prósentustig frá því síðasta vor.
Óvissa og áhætta
Fjárhagsleg og efnahagsleg óvissa er að mælast minni en síðasta vor en um 33% fjármálastjóra á Íslandi telja sig standa frammi fyrir mikilli óvissu, samanborið við 38% síðastliðið vor.
Vaxtastig var nefnt sem stærsti áhættuþátturinn í rekstri íslenskra fyrirtækja annað árið í röð, en svarhlutfallið jókst um 5% á milli ára.
Fjármögnun
Áfram er innri fjármögnun talin hagkvæmasti kostur fjármögnunar hjá bæði fjármálastjórum á Íslandi og í Evrópu.
Um 79% íslenskra fjármálastjóra telja lántöku hjá bönkum óhagkvæma, sem er áframhaldandi vöxtur frá fyrra ári þegar 66% töldu hana óhagkvæma.
