Kaup og sala fyrirtækja

Til að hámarka virði viðskipta í samruna- og yfirtökuferli þarf undirbúningur ferilsins að vera góður. Við vinnum samkvæmt alþjóðlegri aðferðafræði Deloitte sem er til þess fallin að veita leiðsögn í gegnum allt ferlið; frá ákvörðun til samþættingar reksturs.

Þjónusta okkar felur meðal annars í sér:

• Greining á markaði
• Samningsmál
• Ráðgjöf varðandi fjárstýringu
• Ráðgjöf varðandi hagkvæmustu stöðu veltufjár

Í grundvallaratriðum er tilgangur áreiðanleikakönnunar (e. due diligence) að samræma vitneskju og upplýsingar kaupanda og seljanda á félaginu. Áreiðanleikakönnun stuðlar að því, sé hún rétt framkvæmd, að takmarka óvissu vegna viðskiptanna þannig að hægt sé að fækka verulega fyrirvörum og ábyrgðum í kaupsamningi.

Áreiðanleikakönnun er ítarleg skoðun á stöðu og starfsemi fyrirtækis – nokkurs konar heilsufarsathugun.

Áreiðanleikakönnun getur átt við fjölda mismunandi athugana sem kaupandi eða seljandi láta framkvæma í tengslum við viðskipti með fyrirtæki. Áreiðanleikakönnun getur einnig verið unnin fyrir lánveitendur og/eða nýst við fjármögnun viðskipta.

Athuganirnar geta til dæmis snúið að fjárhagslegum málefnum, lögfræðilegum og skattalegum álitaefnum og í sumum tilvikum skoðun á markaðs- og tæknilegum atriðum sem gætu haft veruleg áhrif á starfsemi fyrirtækisins í nálægri framtíð.

Umfang skoðunar fer eftir eðli og flækjustigi viðskipta og félagsins sem er til skoðunar á hverjum tíma.

Áreiðanleikakönnunum má skipta í þrjá flokka:

• Áreiðanleikakönnun í kaupferli
• Áreiðanleikakönnun í söluferli
• Takmörkuð áreiðanleikakönnun

Niðurstöður áreiðanleikakannana eru settar fram í skýrslu sem er til þess fallin að lesandinn geti með einföldum hætti áttað sig á lykilatriðum í rekstri og fjárhag félagsins, sem taka þarf tillit til áður en gengið er frá viðskiptum.

Áskoranir í samrunaferli og sölu einstakra rekstrareininga eru margar og í mörgum tilfellum tekst fyrirtækjum ekki að ná fram þeim ávinningi sem lagt var upp með. Ein helsta ástæða þess er að aðgerðaáætlanir eru ekki settar fram með skipulögðum hætti í aðdraganda breytinga sem og í kjölfar þeirra. Við veitum aðstoð við að setja upp aðgerðaáætlanir og koma auga á mögulegar áskoranir og áhættur í ferlinu þannig að virðisinnlausn sé tryggð.

Stefnubreyting fyrirtækja eftir samruna eða í kjölfar sölu rekstrareiningar veldur óvissu innan fyrirtækja sem og meðal annarra haghafa. Í mörgum tilvikum eykst flækjustig í rekstri fyrirtækis vegna þeirrar breytinga sem eiga sér stað og þannig aukast líkurnar á því að fyrirhugaður ávinningur skili sér ekki. Helstu ástæður þess eru að markmið rekast á, stjórnendur eru ósammála, félagið býr ekki yfir viðeigandi hæfni til að takast á við breytingarnar, samskiptum er ábótavant og/eða undirbúning skortir.

Við aðstoðum við að sjá til þess að breytingarnar gangi snurðulaust fyrir sig og að áhrif á daglegan rekstur séu lágmörkuð.