Námskeiðaröð Deloitte 2026

Algengt er að fyrirtæki innleiði Business Central en sjái takmarkaðan ávinning eftir innleiðingu. Ferlar eru enn handvirkir, innsláttur mikill og ekki tekst að ná fram þeirri hagræðingu sem vonast var eftir. Á fyrirlestrinum verður farið yfir tækifæri til að bæta nýtingu Business Central og auka sjálfvirknivæðingu, bæði innan kerfisins og með tengingum við önnur kerfi, aðra virkni og með notkun gervigreindar. Farið verður yfir raundæmi um hvernig hægt er að ná fram hagræðingu með slíkum aðgerðum og hámarka með þeim ávinning kerfisins. 

Framsögumaður er Logi Jóhannesson · Tækniráðgjöf

Á námskeiðinu verður farið yfir hvað gervigreind er og hvað ekki, hvernig tæknin virkar bak við tjöldin og hvert við sjáum tæknina þróast. Farið verður yfir ábyrga notkun gervigreindar og nokkur praktísk atriði eins og hvernig við fáum sem mest virði út úr tækninni og nýtum hana við okkar daglegu störf. 

Framsögumaður er Olgeir Óskarsson · Tækniráðgjöf

Farið verður yfir helstu kröfur nýs staðals, IFRS 18, sem fjallar um framsetningu og skýringar í reikningsskilum. Staðallinn, sem leysir af hólmi IAS 1, tekur gildi 1. janúar 2027 og mun hafa víðtæk áhrif fyrir þá aðila sem gera reikningsskil í samræmi við alþjóðlega reikningsskilastaðla (IFRS), einkum á framsetningu rekstrarreiknings. Það er mikilvægt fyrir IFRS félög að huga tímanlega að innleiðingu þar sem gerð er krafa um afturvirka innleiðingu og endurgerð á samanburðartölum (vegna 2026). Þá verður einnig farið yfir nokkur viðfangsefni sem algengt er að misskiljist eða gleymist við gerð reikningsskila.

Framsögumenn eru Guðmundur Ingólfsson og Signý Magnúsdóttir · Endurskoðunarsvið

Farið verður yfir lagagrundvöllinn og framkvæmdina, þ.m.t. nýlega úrskurðaframkvæmd, í tengslum við samspil reikningsskila og skattskila. Tekin verða raunhæf dæmi auk þess sem farið verður yfir ýmis álitamál í tengslum við þær mismunandi reglur sem geta gilt um reikningsskil vs. skattskil.

Framsögumenn eru Guðmundur Ingólfsson og Guðbjörg Þorsteinsdóttir · Endurskoðunarsvið og Deloitte Legal

Virðisaukaskattur snertir nær alla anga í rekstri fyrirtækja, hvort sem það tengist innflutningi eða útflutningi, sölu á vörum eða þjónustu ásamt innkaupum aðfanga.

Á námskeiðinu verður farið yfir helstu VSK-þætti fyrirtækja og hvaða atriði ber almennt að hafa sérstaklega í huga þegar kemur að virðisaukaskatti í rekstri fyrirtækja. Einnig verður fjallað um VSK-tengd álitamál varðandi fasteignir, innskattskvaðir, innskattsheimildir o.fl. 

Framsögumenn eru Katrín Björk Þórhallsdóttir og Sandra Lind Valsdóttir · Deloitte Legal

Praktískt námskeið sem er hannað fyrir fjármálastjóra og aðra áhugasama sem vilja öðlast öryggi varðandi úthlutun kaupverðs (PPA). Á námskeiðinu er útskýrt hvernig kaupverði yfirtekins fyrirtækis er úthlutað á helstu efnislegar og óefnislegar eignir, þar á meðal veltufé, skuldbindingar, viðskiptasambönd, vörumerki, tækni og viðskiptavild. Rætt verður hvers vegna það skiptir máli fyrir reikningsskil, afkomu, endurskoðun og samskipti við hagsmunaaðila.

Á námskeiðinu er farið frá grundvallarhugtökum yfir í hagnýta notkun og fjallað stuttlega um helstu verðmatsaðferðir sem notaðar eru við úthlutun kaupverðs á aðgengilegu máli fyrir fjármálafólk. Þátttakendur munu kanna algengar gryfjur og áhættuþætti við framkvæmd kaupverðsútdeilingar, þar á meðal forsendur verðmata, sein framkvæmd útdeilingar, skjölun og áskoranir við endurskoðun.

Þátttakendur munu að námskeiði loknu vera betur í stakk búnir til að yfirfara
niðurstöður úthlutunar kaupverðs, rökræða lykilforsendur, spyrja ráðgjafa réttu spurninganna og útskýra áhrif á reikningsskil fyrir stjórn, lánveitendum og öðrum hagsmunaaðilum.

Framsögumaður er Frímann Snær Guðmundsson · Stjórnendaráðgjöf

Farið verður yfir helstu atriði sem einkenna vönduð og notendavæn fjárhagslíkön og hvernig góðuppbygging líkana eykur rekjanleika, gagnsæi og notagildi.

Fjallað verður um tilgang og uppbyggingu líkana, skýra framsetningu forsendna, skipulag vinnusíða og samræmda framsetningu, ásamt því að farið verður yfir bestu venjur við formúlugerð, villuprófanir og yfirferð. Einnig verður komið inn á viðurkenndar aðferðir og staðla við gerð fjárhagslíkana, auk algengra áskorana og atriða sem gott er að hafa í huga.

Framsögumaður er Haukur Hall · Stjórnendaráðgjöf